Kua pānuitia i tēnei rā he hōtaka karahipi hou mō te reo Māori.
E rima ngā karahipi hou a Te Taura Whiri i te Reo Māori rāua ko Ngā Pae o te Māramatanga i huaina ko ‘Kia Ita’ hei
tautoko i te rangahau reo Māori ki te taumata pae rua o ngā whare wānanga.
E ai ki a Ngahiwi Apanui, Te Tumuaki o Te Taura Whiri i te Reo Māori, “he $10,000 tāra te rahi o ia karahipi ‘Kia Ita’
nei hei tautoko i ngā rangahautanga kōrero mō te whakarauora i te reo Māori.”
He mea whakahaere ngā karahipi nei e Ngā Pae o te Māramatanga, ā, e kī ana a Apanui “e whai ana te mahi tahi ki ngā
Pūtahi Rangahau pēnei i Ngā Pae o te Māramatanga i te whakaaro nui o Te Taura Whiri i te Reo Māori mō te rangahau nā te
Māori tonu i ārahi. Ko tā mātou mahi ngātahi hoki mō ēnei karahipi e whai ana kia whakapakari i ngā mahi rautaki reo,
whakarauora reo hoki a ngā whānau, hapū, iwi, hapori hoki.”
E ai ki te Ahorangi Āpiti Tracey McIntosh te Kaiwhakahaere o Ngā Pae o te Māramatanga, “e koa ana Ngā Pae o te
Māramatanga ki te mahi tahi ki Te Taura Whiri i te Reo Māori ki te tuku atu i ēnei karahipi taumata pae rua. Ka tino
hāngai hoki tēnei mahi tahitanga hou ki ngā whāinga mō te tautoko i te reo Māori me ngā tikanga ki roto i ā mātou mahi
rangahau, ka tika hoki kia rahi ake te mahi tahitanga e tutuki ai ngā tūmanako o ngā hapori me te whenua katoa."
"Ko te reo me ngā tikanga Māori ētahi pou o te mātauranga Māori otirā te Māoritanga tonu. Hei pūmanawa hoki ēnei mea mō
te hauora o te iwi Māori, ā, mā te mahi tahitanga hou nei e whakaatu te whāinga ngātahi mō te reo me ngā mahi rangahau."
Mō ngā whakamārama me te tuku tono mai nei mō ngā karahipi ‘Kia Ita’ peka atu ki te ipurangi a Ngā Pae o te Māramatanga: http://maramatanga.ac.nz/npm-grants
Ka kati ngā tono a te 2 o Noema 2015.
ENDS