Respected kaumātua Tuahine Northover Dies

Wednesday, 6 April 2011, 4:00 pm
Press Release: Ngati Kahungunu Iwi Inc

Ka papā te whaititiri! Ka rarapa mai te uira i te rangi!
E wāhirua ana i runga o Kahurānaki maunga!
Kāhore ia nei ko te tohu o te mate nā i!
Haere rā ngā mate i te ata hāpara!
Takahia e koutou, ka rū te whenua!
Oioi te whenua, oioi te pō, oioi te ao!
Tākiri manawa ki runga ki te rangi!
Tākiri manawa ki raro ki te whenua!
Ka riro i a Apaaparangi!
He tokotoko riri!
Ko Papatūānuku te takotoranga ki runga takapau hora nui!
Ka maranga i konā te Tokorangi!
Nā Tokotokorangi i kāwhaki mai tō wairua!
Takoto mai rā i tō whare taua!

E te iwi, kua mate rā a Tuahine (Joseph) Northover! E 84 ngā tau ka mate. Kei te haria tōnā tūpāpaku ki te marae o Ōmāhu i te ahiahi nei. Hei te Rāhoroi ka nehua i te 11 o ngā haora.

E koro, Tuahine! Tomo atu rā koe ki ngā marae whakaahuru o Tuawhakarere! Pūtakataka pūāwhiowhio tō wairua ki Hokinga-kore-ki-muri! Waiho mai ko ō iwi o Ngāti Porou me Ngāti Kahungunu hei mōteatea atu i tō rirotanga atu!

Haere koutou e te momo o te tangata!

Haere e te pūkōrero! Haere e te manu korokī! Haere e te hau kōtuku!

E te motu, tangihia tō tātau aituā! Kia haehae te ngākau, auē taukiri e!

Respected kaumātua Tuahine Northover sadly passed away today at his home in King Street, Taradale. Tuahine will lie at Omahu Marae, where he will arrive later this afternoon. He will be buried on Saturday at 11am. More details to follow.

ENDS

© Scoop Media